Grèv Alètman

Grèv Alètman

Yon “grèv” alètman se lè tibebe w la te tete byen pandan plizyè mwa epi sibitman kòmanse refize tete a. Sa jeneralman tanporè epi nòmalman pa vle di tibebe w la pare pou l sevre.

Yon grèv alètman ka vle di tibebe w la ap eseye fè w konnen gen yon bagay ki pa nòmal. Tout tibebe yo diferan epi p ap reyaji menm jan. Gen kèk tibebe ki pral kontinye pran tete san pwoblèm. Gen lòt tibebe ki ka jis vin difisil nan tete a. Epi gen lòt tibebe k ap refize tete a entegralman.

Kèk kòz yon grèv alètman gen ladan:

  • Gen doulè nan bouch akòz dantisyon, yon enfeksyon fonjik tankou mikoz oswa yon bouton fyèv.
  • Gen yon enfeksyon nan zòrèy, ki lakòz doulè pandan l ap tete oswa presyon pandan li kouche sou yon sèl bò.
  • Santi doulè akòz yon pozisyon pou bay tete, petèt apati yon blesi nan kò tibebe a oswa apati doulè nan yon vaksinasyon.
  • Kontrarye apre yon bon tan separasyon ak manman ki bay tete a oswa akòz yon gwo chanjman nan woutin.
  • Distrè pandan l ap tete, tankou vin enterese nan lòt bagay ki alantou li.
  • Gen nen frèt oswa bouche ki rann li difisil pou respire pandan l ap tete.
  • Pran mwens lèt nan manman k ap bay tete a apre li konplete lèt matènèl la ak bibwon oswa eksè itilizasyon yon sisèt.
  • Reponn ak reyaksyon manman an si tibebe a te mòde li pandan l ap tete.
  • Reyaji ak chanjman nan savon oswa lòt kosmestik ki ka parèt inabityèl.
  • Reponn ak chanjman nan gou lèt akòz yon maladi, medikaman oswa rejim.

Si tibebe w la nan yon grèv alètman, li nòmal pou w santi w fristre ak kontrarye, espesyalman si tibebe w la pa kontan. Rete pasyan ak tibebe w la epi kontinye eseye ofri tete ou.

SA OU KAPAB FÈ:

  • Eseye tire lèt ou pandan tan tibebe a te abitye tete pou evite angòjman ak kanal bouche.
  • Eseye yon lòt metòd alimantasyon tanporèman pou bay tibebe w la lèt matènèl, tankou yon gode, kont gout oswa kiyè.
  • Siveye kouch mouye ak al tibebe w la pou asire li resevwa ase lèt.
  • Kontinye ofri tete w bay tibebe w la. Si tibebe w la fristre, sispann epi eseye ankò nan pita. Ou kapab ofri tete w tou lè tibebe w la gen dòmi anpil oswa ap dòmi.
  • Eseye plizyè pozisyon pou bay tete, avèk po w san rad toupre po tibebe w la san rad.
  • Konsantre sou tibebe w la epi rekonfòte li avèk touche ak karès siplemantè.
  • Bay tibebe w la tete nan yon sal trankil avèk kèk distraksyon.

Si ou enkyete dèske tibebe w la pa resevwa ase lèt, pale ak founisè swen sante ou. Yo kapab tcheke akizisyon pwa tibebe w la.

Side-Lying-Hold

POZISYON KOUCHE SOU KOTE

  1. Pou tete dwat la, kouche sou bò dwat ou avèk tibebe w la ki ba w fas.
  2. Rale tibebe w la toupre w. Bouch tibebe w la ta dwe nan nivo pwent tete w.
  3. Nan pozisyon sa, ou ka bèse do tibebe w la avèk bra gòch epi soutni tèt ou avèk bra dwa ou ak/oswa zòrye yo.
  4. Kenbe gwo rad ak rad kabann yo lwen tibebe w la.
  5. Chanje pou tete gòch la.

Pozisyon sa itil lè:

  • Ou te gen yon sezaryèn
  • Ou vle repoze pandan w ap bay tibebe a tete.
  • W ap bay tete nan mitan lannuit.
  • Ou menm ak tibebe w la konfòtab nan pozisyon sa
cross-cradle-hold-1

POZISYON TRANSVÈSAL

  1. Pou tete dwat la, itilize bra goch ou pou kenbe tèt tibebe w la nan tete dwat ou ak kò bebe a nan direkyon bò gòch ou. Yon zòrye sou janm ou ka ede sipòte bra gòch ou.
  2. Mete men gòch ou dousman dèyè zòrèy ak kou tibebe w la, kote pous ak endèks ou dèyè chak zòrèy epi pla men ou ant omoplat tibebe a. Vire kò tibebe a nan sans kò w pou vant ou yo ka ap touche.
  3. Kenbe tete ou tankou ou t ap peze yon sandwich. Pou pwoteje do w, evite bese nan direksyon tibebe w la. Olye de sa, rale tibebe w la sou ou.
  4. Pandan bouch tibebe w la ouvri, pouse dousman avèk pla men gòch ou sou tèt tibebe a pou ede li pran tete a. Asire ou kenbe dwèt ou yo lwen.
  5. Chanje pou tete gòch la.

Pozisyon sa itil lè:

  • Tibebe w la prematire
  • Tibebe w la souse fèb
  • Tibebe w la bezwen èd pou li rete nan tete a
  • Tibebe a la bezwen sipò anplis pou tèt
  • Ou menm ak tibebe w la konfòtab nan pozisyon sa a
Football-hold

POZISYON ANBREYAJ OSWA “FOUTBÒL AMERIKEN”

  1. Pou tete dwat la, kenbe nivo tibebe w la, fas devan sou kote dwat ou.
  2. Mete tèt tibebe w la toupre pwent tete w epi sipòte do li ak janm li anba bra dwat ou.
  3. Kenbe baz tèt tibebe w la avèk pla men dwat ou. Yon zòrye anba bra dwat ou ka ede sipòte pwa tibebe w la.
  4. Pou pwoteje do w, evite bese nan direksyon tibebe w la. Rale li vin jwenn ou pito.
  5. Chanje pou tete gòch la.

Pozisyon sa itil lè:

  • Ou te fè sezaryèn
  • Ou gen gwo tete
  • Ou gen pwent tete plat oswa envèse
  • Ou gen gwo kantite lèt ki desann
  • W ap bay jimo tete
  • Tibebe w la renmen manje nan pozisyon vètikal
  • Tibebe w la gen refliks
  • Ou menm ak tibebe w la konfòtab nan pozisyon sa a
CRADLE-HOLD​

POZISYON BÈSO

  1. Pou tete dwat la, bèse tibebe w la avèk bra dwat ou. Tibebe w la pral sou bò gòch li sou janm ou, fas li nan nivo pwent tete a.
  2. Tèt tibebe w la pral repoze sou avanbra dwat ou kote do tibebe w la ap nan pati pa anndan bra ak pla men ou.
  3. Vire vant tibebe w la nan direksyon vant ou. Men gòch ou lib pou sipòte tete w, si nesesè. Zòrye yo kapab ede sipòte bra ak koud ou.
  4. Pou pwoteje do w, evite bese nan direksyon tibebe w la. Olye de sa, rale tibebe w la sou ou.
  5. Chanje pou tete gòch la.

Pozisyon sa itil lè:

  • Tibebe w la bezwen èd pou li pran tete w
  • Ou menm ak tibebe w la konfòtab nan pozisyon sa
laid-back

POZISYON KAGE

  1. Panche pa dèyè sou yon zòrye kote vant tibebe w la touche pa w epi tèt li nan nivo bra a. Gen kèk manman ki twouve chita prèske drèt fonksyone byen. Lòt yo prefere panche dèyè epi kouche prèske plat.
  2. Ou ka mete machwè tibebe w la sou tete w oswa ou ka vle itilize yon men pou kenbe tete w toupre tibebe w la. Sa depann de ou ak sa ou santi ki mye a.
  3. Tibebe w la natirèlman ap jwenn pwent tete w epi kòmane souse.

Pozisyon kenbe sa itil lè:

  • Mete tibebe w la sou pwatrin ou touswit apre li fin fèt
  • Ou gen bonkou lèt k ap desann
  • Ou gen gwo tete
  • Ou menm ak tibebe w la konfòtab nan pozisyon sa